It-tagħlim tal-Malti fl-iskejjel tal-Knisja

Data: Il-Ġimgħa, 11 ta’ Mejju 2012

Post: Ir-Refittorju tal-Kurja, il-Furjana

Ħin: 8.30am – 1pm

Kelliema: Dr Marco Galea u Prof. Charles Briffa

Waħda mill-bidliet fis-sillabu l-ġdid taċ-ĊES (2014) hi l-letteratura. F’din il-laqgħa l-għalliema se jkollhom il-ħin jiddiskutu u jifhmu aktar it-tieni karta tal-eżami.

Fl-ewwel parti tal-laqgħa Dr Marco Galea se jitkellem fuq ir-rumanzett “Il-Ħarsa ta’ Rużann”. Hu se jagħti ħarsa lejn in-nisġa, it-teknika u l-kuntest storiku u soċjali tar-rumanz.

Min-naħa l-oħra, fit-tieni parti, il-Prof. Charles Briffa se jagħmel introduzzjoni qasira fuq il-karta tal-eżami tal-letteratura. Wara se jirrispondi l-mistoqsijiet tal-għalliema. Dawn se jsiru b’mod sistematiku skont il-partijiet tal-karta, jiġifieri (a) mistoqsijiet fuq ir-referenza għall-kuntest (b) mistoqsijiet fuq l-esejs letterarji, (ċ) fuq l-antoloġija  (mingħajr ir-rumanzett), (d) fuq ir-rumanzett, (e) mistoqsijiet ġenerali oħra.

Din il-laqgħa għandha sservi ta’ għajnuna għall-għalliema kollha li qed iħejju lill-istudenti għall-eżami taċ-ĊES. Inħeġġukom tattendu.

Fuq talba tal-għalliema li attendew bi ħġarhom għall-ewwel sessjoni (27/4/12), l-Akkademja tal-Malti u l-Uffiċjali Edukattivi tal-Malti David Agius Muscat, George Mifsud u David Muscat, bil-kollaborazzjoni tal-Kapijiet tad-Dipartiment tal-Malti tal-Iskejjel tal-Knisja Phyllis Debono u Claire Zerafa, se jorganizzaw sessjoni oħra fuq l-ortografija tal-Malti. Din se ssir fit-18 ta’ Mejju 2012, mill-5.30pm sas-7.00pm fiċ-Ċentru tal-Kurrikulu, Triq Sarria, il-Furjana, u se titmexxa mis-Sur Carmel Azzopardi.

L-għalliema tal-primarja u s-sekondarja mħeġġin jattendu u jistaqsu mistoqsijiet fuq l-ortografija Maltija. Napprezzaw ħafna jekk il-mistoqsijiet jintbagħtu minn qabel lis-Sur Azzopardi f’dan l-indirizz ħalli jkun jista’ jitkellem dwarhom dakinhar tat-taħdita. L-għalliema jistgħu jistaqsuh xi mistoqsijiet dak il-ħin ukoll. Kulħadd huwa mistieden jattendi u l-attendenza hija bla ħlas.

Is-Sur Carmel Azzopardi huwa l-President tal-Akkademja tal-Malti u kien għalliem tal-Malti għal ħafna snin. Huwa kittieb u jispeċjalizza fl-ortografija Maltija.

Meta: Il-Ġimgħa, 20 ta’ April 2012

Ħin u post: Fil-5.30pm, il-Kurja

Kelliem: Dr Adrian Grima

Il-parti dwar il-letteratura tas-sillabu l-ġdid tal-Malti fil-livell taċ-ĊES, tiffoka fuq kif tinkiteb il-letteratura, aktar milli fuq it-tema li tittratta l-poeżija.

L-isfida ewlenija ta’ dan il-format il-ġdid tal-eżami tinsab fil-komponiment letterarju ġenerali. F’dan il-komponiment, il-kandidati jridu juru li huma kapaċi jiktbu dwar kif il-poeżiji u n-novelli li studjaw jużaw l-għodod letterarji b’mod effettiv biex iqanqlu l-ħsieb u l-emozzjonijiet tal-qarrejja.

Il-MATSEC qed joffri 2 strumenti li jiggwidaw lill-istudenti u lill-għalliema fil-kitba tal-komponiment letterarju ġenerali:

1) lista ta’ termini letterarji li l-istudenti jridu jkunu kapaċi jużaw

2) karta mudell bi tliet mistoqsijiet għal kull livell (It-Tieni Karta A u B) fit-Tielet Taqsima u l-Komponimenti Letterarji fuq l-antoloġija (minbarra r-rumanzett Il-Ħarsa ta’ Rużann).

Fid-dawl ta’ dan it-tibdil fundamentali, minn eżami li jiffoka fuq it-tema għal eżami fuq kif tinkiteb il-letteratura, Dr Adrian Grima se jmexxi sessjoni interattiva dwar l-esperjenza tal-qari u l-ħila li mistennija jkollhom l-istudenti fl-analiżi tal-letteratura.

Narawkom!