It-tagħlim tal-Malti fl-iskejjel tal-Knisja

Fi tmiem din is‑sena skolastika naħseb kulħadd iħares ftit lura biex jara dak kollu li  jkun wettaq. Kemm xogħol, kemm korrezzjonijiet, kemm laqgħat, kemm pariri u kemm lezzjonijiet ikunu saru! Huwa sodisfazzjon kbir meta tara tant studenti li ħdimt magħhom matul ix‑xhur, iġibu r‑riżultati mixtieqa.  Daqqiet l‑għan ikun intlaħaq u daqqiet ma jkunx intlaħaq għalkollox. Kultant ma tkunx xi ħaġa akkademika, imma xi parir jew kelma ta’ inkoraġġiment li xi student jew studenta jkollhom bżonn. Xi drabi tħoss sodisfazzjon kbir, oħrajn tħoss xi diżappunt. Fil‑ħajja tagħna niltaqgħu ma’ kull tip ta’ sfida u huma dawn l‑isfidi li jġegħluna nibqgħu għaddejjin u nistinkaw. Għaliex l‑importanti mhux li jirnexxilek dejjem. L‑importanti li int dejjem tagħmel ħiltek bl‑aħjar mod possibbli.

Din is‑sena jien qed inħares lura mhux biss lejn din is‑sena li għaddiet imma qed inħares lura lejn il‑karriera kollha tiegħi bħala għalliema u bħala kap tad‑dipartiment. Dan għaliex din kienet l‑aħħar sena tiegħi tax‑xogħol. Matul dawn is‑snin iltqajt ma’ ħafna sfidi differenti, li wħud tawni sodisfazzjon u oħrajn li ħabtu se jaqtgħuli qalbi. Mhux dejjem kien faċli, u forsi mhux dejjem irnexxieli imma nħoss li b’moħħi mistrieħ nista’ ngħid li dejjem ippruvajt nagħmel ħilti bl-aħjar mod possibbli.

Nixtieq nagħlaq billi nirringrazzja lil dawk kollha li ħdimt magħhom kemm fl‑iskola kif ukoll fis‑Segretarjat u nawgura lil kulħadd jiem ta’ mistrieħ mistħoqq.

Phyllis

Is-Sa Phyllis Debono fl-aħħar ġurnata tagħha mal-kollegi tas-Segretarjat. Hawn tidher ma’ Fr Charles Mallia, Dr Rose Anne Cuschieri u s-Sa Marion Pace Asciak u s-Sa Josephine Debattista li rtiraw ukoll. Grazzi tal-ħidma tagħkom!

Aħna, bħala sitt istituzzjonijiet u għaqdiet li naħdmu favur l-iżvilupp kontinwu tal-ilsien Malti, nixtiequ nesprimu l-apprezzament tagħna lill-Kunsill Nazzjonali tal-Ilsien Malti għax-xogħol imprezzabbli li qed iwettaq fuq l-istandardizzazzjoni tal-kitba tal-kliem mill-Ingliż li daħal fil-Malti.

Din il-ħidma sfiqa li ilha għaddejja sitt snin u tmexxiet minn esperti tal-lingwa bis-sehem attiv ta’ għadd kbir ta’ persuni interessati u ħaddiema fl-oqsma tal-edukazzjoni, il-mezzi tax-xandir, it-traduzzjoni, il-pubblikazzjoni, il-lingwistika, u l-kitba kreattiva, wasslet biex il-Kunsill ippreżenta r-rakkomandazzjonijiet tiegħu f’seminar nazzjonali bħal dejjem miftuħ għal kulħadd nhar is-Sibt 18 ta’ Ġunju 2016.

Aħna napprezzaw il-professjonalità tal-Kunsill u fl-istess ħin il-ħeġġa tiegħu li jisma’ lil kulħadd u jdaħħal it-tibdil biss fejn hemm bżonnu. Għal darb’oħra, il-Kunsill għamel l-almu tiegħu biex jiddiskuti ma’ dawk kollha li għandhom għal qalbhom il-lingwa Maltija u jfisser fid-dettall kif wasal għar-rakkomandazzjonijiet tiegħu. Inħeġġu lil dawk kollha li jixtiequ jsemmgħu leħenhom fuq il-kitba tal-kliem mill-Ingliż fil-Malti biex jieħdu sehem ukoll f’din l-aħħar fażi tal-konsultazzjoni pubblika qabel ma l-Kunsill iħabbar id-deċiżjonijiet finali tiegħu, kif inhu mitlub li jagħmel bil-liġi.

Aħna nemmnu li l-Kunsill Nazzjonali tal-Ilsien Malti kapaċi jimxi b’dan il-mod professjonali u demokratiku għax huwa magħmul minn rappreżentanza wiesgħa ta’ dawk kollha li jaħdmu fil-qasam tal-iżvilupp ta’ lsienna.

Minkejja l-fehmiet differenti li jeżistu fuq dan is-suġġett verament kumpless, apprezzajna ħafna, għal darb’oħra, il-kolleġġjalità u l-ispirtu ta’ kollaborazzjoni li jeżistu bejn dawk kollha impenjati fil-qasam tat-tħaddim u l-iżvilupp tal-Malti. Kemm il-Kunsill Nazzjonali tal-Ilsien kif ukoll aħna bħala għaqdiet u istituzzjonijiet ħdimna bis-sħiħ biex noħolqu dan l-ispirtu ta’ kollaborazzjoni ħajja u fl-istess ħin dinamika.

Nirringrazzjaw lill-mezzi tax-xandir tal-interess tagħhom f’dawn ir-rakkomandazzjonijiet li ħabbar il-Kunsill waqt is-seminar nazzjonali tat-18 ta’ Ġunju u nħeġġuhom biex fir-rappurtaġġ tagħhom jirriflettu kemm jistgħu l-kumplessità ta’ dan il-fenomenu u r-raġunijiet lingwistiċi u kulturali li wasslu għar-rakkomandazzjonijiet. Dan huwa suġġett li m’għandux jiġi ttrattat bi preġudizzji jew b’simplifikazzjonijiet bla bżonn.

Din l-istqarrija qed tinħareġ minn dawn l-għaqdiet u l-istituzzjonijiet:

L-Akkademja tal-Malti

L-Għaqda tal-Malti – Università

L-Għaqda tal-Qarrejja tal-Provi

Id-Dipartiment tal-Malti tal-Università ta’ Malta

L-Istitut tal-Lingwistika tal-Università ta’ Malta

Id-Dipartiment tal-Malti tal-UOM Junior College

18 ta’ Ġunju 2016